Seumapa

SEUMAPA

Assalamu’alaikum teuku disinou

Saleum bak kamo lon sanjong sapa

Lon tron digampong lon langkah keunou

Hajad dikamo ientat setia

          Hajad pih katroh tanggoh pih sampou

          Nibak uroenyoe ka meurumpok muka

          Titah seuloktan peusan bak kamou

          Ngon lidah lon nyou geuyu sambong haba

Geuyu jak ientat muda samlakou

Judo cut putro asou istana

Sinyak Abdullah nama sang lakou

Po cut sambino nyak Ti Zulaikha

          Di Lhokseumawe alamat dikamo

          Nibak uroenyo katroh kamo ba

          Kamo jak seurah nibak uroenyou

          Bak geusyik sinou bak ureueng tuha

E tuan bisan neulangkah keuno

Nyompat aneuk droeneuh katroh kamo ba

Neujak teurimong ngon dua jaro

Judo cut putro keuasoe kama

          Dalam peupatah masa saboh rou

          Meuno geukheun pro lam hadis maja

          Dak umpama jagong goh punoh aso

          Adak boh panjo mantong meusutra

Adat ngon meuhukom hukom gohlomgot meuho

Umu aneuk nyo mantong that muda

Dak beda adat bek that neupako

Asai geutanyo saboh agama

          Adak na salah sigeutu saho

          Harapan kamo beuteung ku bina

          Oh jiwo ulhokseumawe pulang keukamo

          Oh jiwo keuno teungku usaha

Rayok that labanibak uroenyo

Meutamah sidroe didalam k.k

Reudok meugantung teungoh  cet uroe

Alamat nanggrou jiek ie raya

          Haba lon balek titik lon ganto

          Cit meunan bago adat seumapa

          Yang bek neuhara keubahan peuneuwo

          Hana ngon lon blou hana beulanja

Bek yang an lon ba bahan peuneuwo

Rap ongkoh moto rap hana pat mita

Mangat bek putuh na bajut bungkoh ulon ba keunou

Meunyo keuaso meusapu hana

          Ranup tho tangke pineung tan asoe

          Lon tamah dudo ngon teube kama

          Pisang saboh mu goh punoh asoe

          Atra ulon blo di keude cunda

Oh lheuh ge bungkoh geuyuba keuno

Got bek soh jaro aneuk wo bak ma

Nyan keuh teungku  teurimong ngon dua jaro

Laen bak kamo meusapu hana

         

          Adak pih male teutap lon iem drou

          Peunteng uroe nyoe linto katroh ulon ba

          Aneuk cempala ateuh bak panjo

          Teungoh cot uro jipoe lam rimba

Neupeuhah jurong  payong neuganto

Bek trep that kamo sinou diluwa

Gampong lon jarak bak ulon jak keunou

Neusayang kamoe meusiblah mata

          Bek le neupeudong kamo lam uroe

          Ru-oh ka jipoe ka bulut muka

          Kru seumangat rahman nibak po

          Mu mada ohnou lon peufon sapa

Pulang keugurei yang po teumpat nyou

Dua blah jaro ateuh jemala

Akhirul kalam ulon peusampou

Mu mada oh nou peufon sapa

          Teurimong geunaseh dari kamo

          Pihak linto baro yang troh dari

          Kota lhokseumawe kamou pulang

          Keugure nyang po teumpat nyou.

                             ( Amin ya rabbal ‘alamin )

A.  Jawaban dari pihak linto baro

Sayang ticem yang blang mirah bak hate

Pakon ticem gle puteh bak dada

Kon han ek lon blo mkeusaboh hp

Ek lon seumike meubacut pulsa

         Wate teungku miscol lon tuan pah habeh batre

         Lon teugen ok sinyal pih hana

         Buatan Allah siat-at mate

         Peulom nyan hp peuneugot cina

Paken bangai that cara seumike

Peu tamu pake pue taseumapa

         Angen dilaot jipot meutaga

         Dalam kuala bicah geulumbang

         Bunou kateurimong peu nyang kamo ba

         Ngen jarou dua ngon dada lapang

Male neuh that-thataso lam raga

Memacam raga meulumah neupandang

Sileuweu dalam ngon keutang BH

Meupu warena meudum ukuran

         Lon lake meuah ngon jaro dua

         Hana seungaja bak salah pasang

         Yang boeh peuneuwo linto udalam raga

         But ureueng tuha lon kalon beuklam

Oh lheuh tuwo bak geupareksa geubungkoh

Ureung katuha mata kureung trang

Get that ulon top yoh wate ulon ba

Mungken teubuka wate bak jalan

B.   Sambong pertanyaan pertama/ jawaban

Kalinyou karoh lon boh lam raga

Yang akan teuka jeut lon boh lam eumpang

Adat Aceh nyou bak kamo pih hana

Beusama-sama beutatem peutimang

         Bek kamo meutop digop jibuka

         Kiamat donya hana berjalan

         Keuritik ngon saran teungku muehta

         Lon peumulia ngon dada lapang

Aneuk kuttru ateuh bak panjo

Teungoh cet uroe jiboh geuk dua

Ujong meujungkan uram meu gilhe

Kalon bangou teuku seumapa

         Keuneujak tanyong sigala bago

         Neupike aneuk kamonyoe buta agama

         Jijak meununtut rata jeut sago

         Sampo oh dudo troh u sama dua

Lon jak peusantren u ara kundo

Dudo lon peuwo u samalanga

Bak abu kuta krueng lon yang peuruno

Ek mungken aneuk kamo nyo buta agama

         Dudo lon peunikah awai lon peureuno

         Seubab kawen nyo kon pura-pura

                                        ( selesai jawaban pertama )

C.   Jawaban keudua linto baro

Reudok di Aceh ujeun dipadang

Bicah geulombang laot sumatra

Sigala eleume beu ek jeut ji faham

Ayat al-Qur’an beujuet boh makna

        Menyoe neutayong jibeut kuruan

        Nibak peusantren cit nyan dibaca

        Beu that tan malem jitem peutimang

        Aneuk lon tuan meufom agama

Habeh lon peubloe tanoh-tanoh blang

Eleume tuhan lon yue jak mita

Fon lon yue jak beuet nanggro pakistan

Oh lheuh nibak nyan u rabia

        Ji kuliah lom nanggrou jeureuman

        Oh lheuh nibak nyan nangggroe beulanda

        Ji jak cok titel dinanggroe jeupang

        Jiwou disinan alue kala

Di alue kala jicok jabatan

Lua ngen dalam eleume kana

Bit han neupateh haba lon tuan

Jeut tungku undangnibak musalla

        Jeut neumeu kitab melhee boh eumpang

        Neugieng jeut jeut jifam ngen jiboh makna

        Menyoe jibeut nahu ngon kitab lapan

        Jibeut kuruan tamat aleh ba

Ngon ulon tunggku bek macam-macam

Keu ngen lon lawan teungku seumapa

D. Jawaban ke Lhee dari Linto Baro

Di guneng rawa sereuba buleun

Makanan bayeun boh kaye rimba

Lon ikat ka-oi paleut seulinteung

Beu ek meuteumung lawan seumapa

        Meutuah babah na dube lon kheun

        Meutuah beuluen han payah mita

        Rimba lon aroeng gunong meulinteung

        Padup trep jameun lawan lon mita

Nibak uroe nyou baro lon teumeung

Cukop that useung ureung seumapa

Menyou dum teungku golom get useung

Lon turi ureueng yang kana nama

        Jameun na meugah nek Rasyid ireun

        Ji the le ureueng bak geuseumapa

        Thon dua ribee lhee nyawong tuhan tueng

        Nek Rasyid ireun peulikot donya

Oh ban hana le nek Rasyid Bireun

Tinggai pak Alam ureueng seumapa

Aneuk manok get di nangggro Bireun

Manok ka useung meulet lam kota

        Neusaba siat hana that seu-um

        Bak ulon peunyum lawan bit teuga

        Menyoe gopnyan pek teunte ulon theun

        Leubeh ngon kureueng teunte lon saba

Tajak u cet goh beutroh u piyeung

Tajak u Leu Pung rot jalan Lhok Nga

Meuka bicah phet  saket lam tuleung

Beurangkaso ureueng han ek neu saba

        Padum krek ija nyang ka lon di yeueng

        Padum droe ureueng yang kalon peukara

        Umpama ija palikat ulon jeuet diyeueng

        Ken ija teumeung lam guni monja

Tajak u gayo tawo rot Bireuen

Tajak u bayeung ret sangou raya

Hate kateupeh han ek lon peutheun

Neutem yu raheung kamo diluwa

        Han neubi gilho meu aneuk rinyeun

        Pat toh neuteumeung lage nyan haba

        Di Banda Aceh alam cap peudeung

        Cap sikureueng lam jaro raya

Cap bak bate labang bak peudeueng

Peuyang ka lon kheun han le lon tuka

Linto lon peuwo bit-bit han neutung

Yang ka neutaguen keuso neu nek ba

        Bah sinan basi diyup seurayung

        Lon lake izin linto lon  jak peugisa

        Ie dilaot surot  ngon paseueng

        Hayot dalamkrueng cabeueng gelima

Langkah raseuki mawot peutumeun

Atra nyan bandum kon bak manusia

Linto lon peuwo menyo han neutueng

Laen lon teumueng singoh lon gisa

       

        Hana yang puteh yang itam galeun

        Gadis han jitung  mita yang janda

        Beuthat di aneuk kana sikureueng

        Asai beumalem carong agama

Ie dilaot seurot ngon paseueng

Keudidi madeueng bak tunjang banka

Di bineh laot troh bineh uteu

Han lon teumeueng lage nyoe haba

        Karoh neujak let aneuk guda plueng

        Ngen aneuk rimung bek neumeusunda

        Beurani neujak let menyo lon tem plung

        Meuka meukaleueng pane lonsaba

Menyoe neujok lapan pulang sikureueng

Talo han lon tueng meunang lon mita

Bek nyang an talo siri han lon tueng

Male lon tuan gop teu eh nama

        Seunampang cina beude lhee larah

        Keudeh jitatah ka unanggro kleng

        Sumpah kalawi janji ka leupah

        Menyou neu ubah beurangkri lon tem

Manyang meuhalak puncak gurute

Seunaro nyang lhe singet udaya

Han sep seureutoh taboh siribe

Asai bak male bak ureueng tuha

        Leubeh got mate dari pada male

        Amanah gure ketua MAA

                                                ( selesai )

E.    Penjemputan Linto Baro oleh Pengampe

Pinto ka teuhah payong ka keumang

Tanda seulokta tamong istana

E ma penggape ranupbate kana lampuan

Jak tueng rombongan jeh pat dilua

        Polinto baro tamong udalam

        Tanyou bak tuhan ta mohon doa

        Tameuseulaweut keu Muhammad

        Pang ulee alam rasul mustafa

Oh ban sare troh bak aki rinyeuen

Geu peudeng siseun le ureueng tuha

Geu cok nge ie dalam ceurahi

Geupeurah gaki linto baro ma

        Lheueh gerah gaki geuba udalam

        Geusambot rijang ka uleh maja

F.  Sapa Jame Rombongan Linto

Peusan ahli bet bak ulon tuan

Meudum rombongan yang katroh teuka

Yang ibuk keuno udalam

Yang agam-agam bah sino diyup tenda

        Neuduk neupiyoh kamo bi lapang

        Deungong hidangan ka tersedia

        Peusinget geupet peubasah jaro

        Makeun teungku drou meubu ngon sira

Euengkot di laot ji wet-wet iku

Teungku pajoh bu kuah ie mata

Kuah boh panah gule bak pisang

Cit meuno reusam kamo di desa

        Masen ngom keu-eung ngon masam

        Dengon harapan beurayok saba

        Adak pih neuwo gampong halaman

        Bak rakan-rakan bek teuengku buka

Oh no keuh saja haba lon tuan

Deungon wasalam kamo seumapa

                                               ( sekian)

        Oh no mantong acara seumapa Adat Aceh preh linto baro dari ulon tuan T. Alamsyah anggota MAA kota Lhokseumawe, leubeh ngon kureueng lon lake meu-ah, bek neucok keurayok hate lon takot hana pat jiduk jantong, neunit mantong haba seumapa. Uroe nyoe umpama ureueng krui pade meunan keuh tamse neuboh umpama menyoe yang soh-soh ka agen bape yang meuaso tinggailam tika,yang got neutung yang brok neukubah menyou nasalah lon lake meuah, hana lon saja lage peupatah dalam hadist maja.

        Pat yang na boh panah yang hana meugeutah

        Yang na boh birah ngon boh keuladi

        Pane na haba manusia yang hana salah

        Kecuali firman Allah ngon sabda Nabi

 Lon akhiri hadanallah waiyakum ajmain billahi taufik walhidayah

Wassalamua’laikum wr....wb